^*ŝrank/o ^UV

Meblo en formo de alta kesto, fermebla per unu aŭ pluraj pordetoj, provizita je bretoj aŭ hokoj por konservi vestojn, tolaĵojn, manĝaĵojn, teleraron aŭ alispecajn objektojn: hejme la ŝuoj estis metitaj en ŝrankon [1]; li havas plenan ŝrankon da arĝentaĵoj, ne kalkulante la enhavon de la sekretaj fakoj [2]; kuireja ŝranko […] ruĝa ŝranko vitrita [3]; enmura ŝranko [4]; subŝtupara ŝranko [5]; ŝranketoj por konservado de formularoj, stampiloj, kolorigaĵo [6]; librobretaro plenplena je belaj bindaĵoj, aktoŝranko, ĉio aperis kalkulita por maksimuma efikeco [7]; ŝi rapideme kuradis de la tablo al la grandega kverkligna telerŝranko kun verdaj vitroj kaj reen, transportante la manĝilaron ^Metrop ; li kaŝis […] ambaŭ knabojn en grandan ŝrankon [8]; mi sendis mian serviston pro la mantelo, kaj li metis ĝin en la ŝrankon kun miaj aliaj vestoj [9]. komodo

(frazaĵo) Publikigi memkoncernan aferon, pri kiu oni antaŭe diskretis aŭ sekretis: ekde tiu tempo mi „elŝrankiĝis“ kaj publike koncedas ke mi estas samseksemulo [10]; neelŝrankiĝintaj antisemitoj [11].

(tr)

Enmeti, ordigi en ŝrankon: kiam en 1918 revolucia Rusio fermas la militon per aparta paco, Vladimir Galavamov, kun flaro de vera oportunisto, enŝrankigas la pastran veston, kiun li ĝis tiam elmontris […] kaj translokiĝas al Moskvo [12].

Fridujo: mi trovis ĉi tiun viandon en la fridoŝranko, mi preparas ĝin por rostado [13].

Ŝranko kiu tenas interne froston por konservi nutraĵojn ks: Margarita tie faris por si glacion, kiun Marko portis al la hejmo […] por ĝin konservi en ties frostoŝranko [14]; frukta gelatenaĵo kun la fruktoj, rekte el glaciŝranko [15]; malgranda glaciŝranketo [16]. glaciujo

Metala, fortika ŝranko kun speciala seruro por konservo de multekostaĵoj: li iris […] al la banko kie s-ino Jendrik konservis monŝrankon [17]; la mono estis en la kirasŝranko [18]; la interŝanĝo […] estis konfesita en la letero, kiun mi ŝtelis el la gardoŝranko notaria [19].

Brethava ŝranko, ofte kun vitraj aŭ sen pordoj, destinita por libroj: Vicigitaj flank'-ĉe-flanko, ⫽ Sur bretar' de l' libroŝranko ⫽ Ili staras en spaliroj [20]; en kabineto [troviĝis] molaj sofoj kaj seĝoj, inkrustita libroŝranko […] kaj kverkligna skribtablo ^Metrop ; la granda libroŝranko, en kiu staris multe da sciencaj kaj interesaj libroj [21].

Niĉo kun lito kaj fermebla per pordoj; ŝranklito, alkovo: li vekiĝis kaj puŝmalferminte la pordetojn de la litŝranko [22]; mi staris sur la planko antaŭ mia dormŝranko [23].

Bone aerumita ŝranko, taŭga por konservi manĝaĵojn: tiu pilolo ŝirmos vian manĝaĵon kontraŭ muŝoj kaj ĉiuspecaj insektoj, nur metu unu en vian kuirejon aŭ manĝoŝrankon, kaj vi forigos la danĝeron [24]; sufiĉas iom trarigardi vian manĝoŝrankon kaj tuj elpensi burgeron [25]!

Ŝranko por tenado de vestoj, ofte kun instaloj por ilin pendigi: kurinte al la vestŝranko, mi prenis pantalonon de mia patro kaj iris stalon [26]; Anna Petrovna […lin] helpis alivestiĝi, doninte el la nova vestŝranko kun granda spegulo hejman pantalonon kaj jakon de antaŭrevolucia fasono ^Metrop ; la rompiĝintan zonon vi trovos en la kesto apud la vestoŝranko [27].

Vertikala vitrino en formo de ŝranko kun vitra antaŭo aŭ vitraj pordoj: ekspoziciejo [kun] 13 surmuraj informpaneloj, 5 tablovitrinoj kaj vico de vitroŝrankoj [28]; Agripina ekzamenis liajn familiajn diojn, kiuj estis ekspoziciataj malantaŭ la malfermitaj pordoj de inkrustita montroŝranko en la formo de miniatura sanktejo [29]; apud ĝi, vitroŝranko povus stari kun iom da porcelanaĵoj [30].