²konferenc/o ^VdE

Aranĝo² el kunsidoj de kompetentuloj, ofte tiuj loĝantaj diversloke, por debati kaj interkonsiliĝi pri gravaj aferoj en difinita kampo (ekz-e scienca, politika, diplomatia k.a.): li estas filo de konferenca konsilano [1]; la Pariza Konferenco ^VivZam ; packonferenco [2]; konferenco de eŭropaj ministroj respondecaj pri instruado [3]; konferenco pri perkomputila tradukado [4]; antaŭ nelonge okazis internacia konferenco por la apliko de esperanto en la scienca kaj komerca fakoj [5]; en Tesaloniko jam okazis preparkonferenco de ĉiuj ortodoksaj patriarkioj kaj landaj eklezioj [6]; finiĝis en Bruselo la unua konferenco pri financado de la Stabilecpakto por Sudorienta Eŭropo [7]. kolokvo, kongreso, prelego, simpozio

Rim.: En scienca konferenco prelegoj havas gravan rolon. Tiel estas internacie kaj tiel estas en Esperantujo (ekz-e en la tradiciaj AEST-konferencoj pri „Apliko de Esperanto en Scienco kaj Teĥniko“). Alia afero estas, ke la vorto konferenco estas aplikata ankaŭ al aranĝoj politikaj (packonferenco, sindikata konferenco, partia konferenco), ĵurnalistaj ktp; sed en tiaj okazoj temas pri aliaj signifoj de la vorto, malrekte rilataj al la termino scienc-teĥnika ― same kiel la vorto „kongreso“ estas aplikata kaj al fakaj kunvenoj (Tutmonda matematika kongreso), kaj al institucioj politikaj (ekz-e en la usona parlamento aŭ en la nomo de iuj politikaj partioj). Laŭ mi, la diferenco inter la fakaj ‹kongreso ― konferenco ― simpozio› konsistas en la skalo: kongreso estas aranĝo tutmonda aŭ tutkontinenta; konferenco estas mezgranda (ofte internacia, sed eble tutlanda, tamen sufiĉe reprezenta kaj geografie, kaj laŭ la temaro); simpozio estas pli modesta kaj kutime pli specialtema. „Kolokvo“ estas nacia varianto de la vorto „simpozio“, laŭ mi evitinda en Esperanto. [Sergio Pokrovskij]

Partopreni en konferenco: en februaro datrevene konferencis en Benino politikistoj, sociologoj kaj aliaj eminentuloj por konsideri dek jarojn da ŝanĝoj en Afriko [8]; estas vere granda plezuro konferenci en tia loko [9].

Partoprenanto en konferenco: konferencanoj povis renkonti diversajn etnogrupojn en Kosovo kaj informiĝi pri ilia nuna situacio [10]; ĉiu konferencano ricevas tekston de la raporto antaŭ la buŝa raporto [11]; la datrevenaj konferencanoj rekonis, ke krom en Benino, Malio kaj en malmulto da aliaj landoj, la tiama demokratia iniciato fiaskis [12].

Kunsido, en kiu respondeculoj (ekzemple politikaj) respondas la demandojn de ĵurnalistoj: dum gazetara konferenco antaŭ la komenco de la aranĝo ambaŭ eksaj politikistoj vaste parolis pri la graveco ŝpari energion kaj naturriĉaĵojn [13]; dum jardekoj oni povis dum gazetaraj konferencoj de la komisiono starigi demandojn nur en la franca kaj ricevi respondojn en la franca [14]; Saĥarov trifoje faras deklarojn, organizas gazetarajn konferencojn, kie li malaprobas tiun agon [en Afganio] [15].

(evitinde) Videkunveno: komunikkanaloj ebligas transsendon de filmoj, kaj videokonferenco estas jam realaĵo [16]; per videokonferenco parolis el Usono profesoro Sami Repishti, eksa ribelulo [17].

Rim.: La internacia vorto videokonferenco signas al la telekomunika procedo, per kiu pluraj homoj distance interparolas sone kaj bilde. Pri konferenco plej ofte ne temas. Pro banaliĝo videokonferenco probable cedos al pli ĝustaj videkunveno, telekunveno aŭ similaj. [ĵv]