hast/i ^SPV

(ntr)

Rapidigi siajn agojn, por pli baldaŭ plenumi ion; agi kun nekutima, nenormala rapideco: ne hastu fari vian taskon, vi disponas la tutan necesan tempon; la kelneroj hastis fortirante la tukojn de la tabloj [1]; mi sciis, ke mia patrino ne liberigos min ĝis kompletigo de la tasko, do mi hastis por fini ĝin [2]; „ne tian ilon“, Alico hastis klarigi [3]; ĉu fakte jam pasis du jaroj depost tiam? je Amono, kiel hastas la tempo, forportate nin al la eterneco! [4]; se damo petas pri io, jen vi devas hasti kaj fari, eĉ se tio kostus vian vivon [5]; mi vere tro hastis pri mia juĝo, la usonaj konsuloj pli bonas ol ilia reputacio [6]; [sur] la korto de la digna universitata kastelo denove hastas studentoj al kursoj [7]; ŝi hastis pro pluraj taskoj de la tago: je la tria rendevuo kun sia advokato ĉe la alia urboflanko, je la kvina inaŭguro de ekspozicio […], je la sepa ĵudo-kurso [8]; la lingvoj en vivdanĝero hastu restigi skriban ateston pri siaj kulturaj akiraĵoj [9]. rapidi, urĝi

Deziro, ke io estu tuj farata; senpacienca penado atingi celon: letero skribita kun hasto; la ŝipestro jam kun gaja humoro kaj sen hasto lasis surakvigi la boatojn [10]; en kondiĉoj de danĝero, streso aŭ hasto, [ili] havas inklinon senpripense refoje stumbli [11]; tiuj verkoj […] pro la hasto ne ĉiam [aperas] en kvalito inda al la temo [12]; lia vizaĝo ŝajnis konata al Adriano, sed pro la hasto li ne sukcesis ĝin bone esplori [13]. tempopremo, urĝo

Tre aŭ tro rapida; farita sen matura pripenso aŭ preparo: hasta manĝo, adiaŭo, konkludo; ŝi povas ripozi kaj sonĝi pri pasintaj tempoj, kiam oni ne tiom multe pelis ŝin kiel en niaj hastaj tagoj [14]; li eksperimentis […] ekspresionisman esprimmanieron, kun nervaj frazkonstruoj, hastaj, malegalaj paragrafoj, kiuj sekvas la ritmon de la pensodisvolviĝo [15]; ju pli haste, des malpli rapide. hektika², urĝa

Rapidema; neniam volanta perdi iom ajn da tempo: hastema servistino malsuprenkuras ŝtuparon [16]; hastema mi ne volis montri min, ĉar momento tia postulis unikan amoran ceremonion longdaŭre ĝuindan [17]. malpacienca

Igi fari ion pli rapide: mi tute ne volas hastigi ilin pri io, kio bezonas paciencan, zorgan formulprecizigon [18]; la vera realo estas ke la metroaj kondukistoj, ĝenerale parolante, ne atendas ke la pasaĝeroj eliru kaj eniru, kaj nur por hastigi ilin, ili aŭdigas la signalon [19]. peli¹, urĝi¹akceli

Ne rapidema, okazanta laŭ trankvila takto: ni marŝis malhaste laŭ la bordo [20]; movo de la lumboj puŝis lian karaĵon antaŭen, kaj revene, laŭ senhasta kadenco [21]; la vivrapido estas malstreĉa kaj senhasta en la pli malgrandaj urboj de nordo [22].