¹dekret/o ^JED

Oficiala ordono de rajtigita aŭtoritato (kontraste al leĝo): eldoni dekreton; en ĉiu urbo […] kien atingis la ordono kaj dekreto de la reĝo, estis ĉe la Judoj ĝojo kaj gajeco [1]; la katolikaj pastroj akiris Papan dekreton, kiu malpermesis al la hebreoj loĝi en tia proksimeco de la ĉefa preĝejo ^RBa ; li sentis sin kvazaŭ en kaĝo de leĝoj kaj dekretoj ^HsT ; la „iniciatinto“ de Esperanto […] fidis la popolon de l' uzantoj, kontraŭe de Beaufront volis limigi la progreson per dekretoj ^VivZam ; en la baltaj respublikoj de USSR Estonio, Litovio, Latvio estis publikigitaj dekretoj pri la enkonduko de Esperanto-instruado en lernejojn sub difinitaj kondiĉoj ^EeP ; (figure) virina peto estas dekreto ^KrM ; la dekreto estis akceptata per kakofonia hurlado de protestoj ^VaK . buleo, edikto, ukazo

(tr)

Ordoni per dekreto: tio efektive estas dekretita, kiel neforigebla leĝo de Medujo kaj Persujo [2]; kvar monatojn poste, Himmler dekretis la dissolviĝon de la Esperanto-Movado en Germanio ^EeP ; duko Vilhelmo la 4a […] dekretis, ke por biero oni uzu nur hordeon, lupolon kaj akvon [3]; sinjoro petas, kvazaŭ dekretas ^PrV .