¹⁹²³analog/a ^PV

1.

Simila laŭ kelkaj rilatoj al alia afero de malsama speco; parte simila: Hašek pioniris novan verkstilon, analogan al tiu de la tiutempaj dadaismaj pentristoj [1]; samtempe kun Darwin alia esploristo, Alfred Russel Wallace, elpaŝis kun la teorio, kiu estas preskaŭ analoga al tiu de Darwin [2]; analogaĵo [3]. analogia

Rim.: En OA7 aperas la noto: „Laŭ la voĉdono de la Lingva Komitato, publikigita en cirkulero de la 12-a de Majo 1923, la radikon analogi’(o) de la 1-a Oficiala Aldono oni ŝanĝis al analog’(a) kaj analogi’ ne plu estas oficiala.“

2.

Simila laŭ funkcio sed laŭ biologia historio ne samdevena: la flugiloj de vesperto estas organo analoga, sed ne simila, je la flugiloj de birdo. homologa²

3.

Funkcianta surbaze de fizika simulado, kaj precipe per kontinuaj grandoj; kontinua: analoga komputilo, analoga televido, analoga modelo; la analoga sistemo malaperos favore al la jam funkcianta cifereca, ĉe kiu sur unu frekvenco troviĝas pluraj ciferecaj radio- kaj televid-stacioj [4]. cifereca

Laŭ analoga maniero: la turka registaro ankoraŭ ne agnoskis la genocidon, kiel analoge la germana agnoskas la holokaŭston [5]; mi ne povas forgesi, ke Hamas estas islama organizaĵo esence socihelpa, aganta por sanitara, civila, instrua asistado al la loĝantaro, profunde enradikiĝinta en la palestina socio, analoge kun samspecaj kristanaj organizaĵoj [6].

Parta simileco de malsamspecaj objektoj: dimensia analogeco estas studado de tio kiel n - 1 dimensioj rilatas al n dimensioj, kaj tiam konkludado de tio kiel n dimensioj devus rilati al n + 1 dimensioj [7].